जिजाऊ.कॉम हा एक, राष्ट्रमाता जिजाऊ आणि छत्रपती शिवाजी महाराजांच्या विचारांनी आणि कर्तुत्वाने प्रेरित होऊन, राष्ट्र निर्माणाचे कार्य करणाऱ्या आणि करू इच्छिनाऱ्या तरुणांसाठीचा एक मंच आहे. २००८ पासून, जिजाऊ.कॉम विविध माध्यमांतून आणि लोक सहभागातून महाराष्ट्रातील ग्रामीण समस्यांबद्दल विविध पातळीवर काम करत आहे. महाराष्ट्राच्या काना-कोपऱ्यात जिजाऊ, शिवबा आणि संभाजींच्या प्रेरणेने अनेक उपक्रम तरुण (त्यात तरुणी ही आल्याच) राबवत आहेत. त्या तरुणांच्या विचारांना, कामांना लोकांपर्यंत पोहचवण्याचे काम जिजाऊ.कॉम करते. जिजाऊ.कॉमच्या या चळवळीला लोकांनी मागील काही वर्षात भरभरून प्रतिसाद दिला.

संक्रमण स्थितीतला महाराष्ट्र आणि भारत खंबीरपणे उभे राहावेत आणि इथला समाज स्वतःच्या खांद्यावर स्वतःच डोकं ठेऊन जगणारा असावा म्हणून, आपण सगळ्यांनी जमेल तिथे - जमेल तसं प्रयत्नरत राहायला हवं. राष्ट्रनिर्माणाची प्रक्रिया थांबणारी नसते. महाराजांनी आपल्याला लोककल्याणकारी स्वराज्य आऊ जिजाऊंच्या प्रेरणेने उभं करून दिलं. संभाजी महाराजांनी ते स्वराज्य कायम राहावं आणि वाढावं म्हणून स्वतःचे प्राणही दिले. त्याच लोककल्याणकारी उद्देशाला आणि त्यागाला समोर ठेऊन आपण इथला वंचित, गरीब आणि सामान्य माणूस चांगलं आयुष्य कसा जगू शकेल यासाठी प्रयत्न करायला हवेत. त्या प्रयत्नात जिजाऊ.कॉमवर तुम्हाला तुमचे साथीदार मिळतील. हे उदेष्य ठेऊन येत्या काळात पुन्हा नव्याने हा मंच पुढे नेण्याचा प्रयत्न आम्ही करत आहोत.

हे करत असतांना आम्ही कार्यकर्त्यांनी एक विचार उराशी बाळगलाय. तोच तुम्हीही बाळगत असाल तर सोबत काम करूयात. "आम्हाला माहित नाही, आम्ही जग बदलू शकू की नाही, पण त्यासाठी एकदा प्रयत्न करायचा निश्चय आम्ही केलाय!"